Vishal Garg, forstjóri fyrirtækisins Better Mortgage, boðaði starfsfólk sitt til einhliða Zoom-fundar síðastliðinn miðvikudag. Vishal færði starfsfólki sínu engar gleðifréttir fyrir jólin heldur sagði hann um 900 þeirra upp. Myndband af uppsögninni hefur farið í mikla drefingu á alnetinu og valdið mikilli reiði, bæði meðal starfsmanna og annarra, í garð fyrirtækisins.
„Ég er ekki með svo góðar fréttir,“ sagði Vishal í upphafi símtalsins. „Ef þú ert í þessu símtali þá ertu hluti af óheppna hópnum… þið eruð ekki lengur með starf hjá þessu fyrirtæki, þetta tekur gildi nú þegar.“
Þessi ákvörðun skýtur skökku við í ljósi þess sem Vishal sagði í september á þessu ári. „Eina leiðin til að sjá til þess að starfsfólkið okkar komi vel fram við viðskiptavini okkar er að sjá til þess að við komum vel fram við starfsfólkið okkar.“
Viðskiptablaðið fjallaði um málið í dag og vakti athygli á því að Better Mortgage sé að fara að sameinast sérhæfða yfirtökufélaginu Aurora Acquisition, sem leitt er af Novator, fjárfestingafélagi Björgólfs Thors Björgólfssonar. Sigurgeir Jónsson kom að stofnun Better Mortgage og starfar þar nú sem yfirmaður fjármálamarkaða. Sigurgeir og Björgólfur eru frændur.
Í síðustu viku var það tilkynnt að Better fái um 98 milljarða í íslenskum krónum frá yfirtökufélaginu Aurora þegar í stað. Better fékk þessa milljarða til að renna stoðum undir frekari vöxt fyrirtækisins en einnig til að styrkja efnahagsreikninginn. Þessir milljarðar dugðu þó greinilega ekki til að halda þessum hundruðum starfsfólks í vinnu yfir jólin.
