Tilkynnt var til lögreglu í dag um reyk sem bærist frá fjölbýlishúsi í hverfi 104. Kom síðan í ljós að um var að ræða gufu sem barst frá vinnusvæði og því engin hætta á ferðum.

Þetta kemur fram í dagbók lögreglu.

Einnig segir frá því að tilkynnt var um að bíl hefði verið ekið utan í aðra bíla í hverfi 105 og stungið af. Ökumaður bílsins lenti stuttu síðar í umferðarslysi þar sem hann endaði á tré. Ökumaður er grunaður um akstur undir áhrifum vímuefna og var vistaður í fangageymslu í þágu málsins.

Tilkynnt var um sofandi mann á bensínstöð í Kópavogi. Hann var handtekinn, grunaður um vörslu fíkniefna.