Fréttablaðið skýrir frá þessu í dag. Haft er eftir Steinari að honum hafi borist nýjar og sláandi upplýsingar frá lögmanni í gær og að þessar upplýsingar geti hugsanlega skýrt af hverju engin rannsókn fór fram á starfsemi barnaheimilisins á Hjalteyri við Eyjafjörð á sínum tíma eða að hún hafi jafnvel verið stöðvuð. Steinar segist telja þessar upplýsingar mjög trúverðugar.
„Þetta eru upplýsingar um að Hjalteyrarmálið hafi verið þaggað niður þar sem um þjóðþekktan einstakling hafi verið að ræða. Einstakling sem að nokkru leyti bar ábyrgð á að svo fór sem fór og að málið var ekki upplýst á sínum tíma. Mér brá mjög illa, því mig hefur alltaf grunað að eitthvað ósagt stæði í veginum fyrir því að rannsóknin færi fram,“ er haft eftir Steinari.
Hann sagði að árum sama hafi hann grunað þetta, eða allt frá því að hann hóf baráttu fyrir því að réttlætið myndi ná fram að ganga en aldrei hafi hann órað fyrir að hugsanlega væri verið að halda hlífiskildi yfir opinberri persónu á kostnað barnanna.
Tímabilið sem hann vísar til er þegar Vistheimilanefnd var að rannsaka starfsemi annarra barnaheimila. Þeirri rannsókn lauk í sumum tilvikum með afsökunarbeiðni og sanngirnisbótum en ekkert var aðhafst vegna Hjalteyrarheimilisins.
