Þorgrímur Þráinsson rithöfundur er gestur Sigmundar Ernis í þættinum Mannamál í kvöld. Í þættinum ræðir Þorgrímur um margt og mikið, meðal annars um tímabilið þegar hann tók þátt í átaki gegn reykingum.

Átakið gekk ekki áfallalaust fyrir sig en Þorgrímur segir frá áreitinu sem hann fékk í kjölfar þess. „Auðvitað móðguðust mjög margir reykingamenn við þennan áróður sem auglýsingastofan átti bara heiður af ásamt okkur öllum og ég náttúrulega lenti í bölvuðu basli bara,“ segir hann og nefnir dæmi um hvernig áreitið fór fram.

Mannamál: Þorgrímur Þráinsson

„Ég fór að skemmta mér og það var ráðist á mig og ég fékk hótunarbréf heim til mín. Mér var hótað lífláti og að konunni minni yrði nauðgað og ég tók mig úr símaskránni.“

Á þessum tíma seldust bækur Þorgríms ekki jafn vel. „Ég meina, ég var að  móðga stóran hluta þjóðarinnar með áróðri gegn reykingum og af hverju ætti fólk að fara út í búð og kaupa bækur eftir mig. Þannig ég ákvað bara að fórna mínum rithöfundaferli tímabundið og gera gagn í samfélaginu,“ segir hann.

„Ég er bara mjög stoltur af þessu og meira að segja enn í dag þegar ég mæti einhvers staðar fólki sem er að reykja þá yfirleitt tekur það sígarettuna fyrir aftan bak, ég er ekki að grínast, eins og það komi mér eitthvað við.“