Úlfur Óli Jónsson var staddur ásamt vinum sínum í bústað í nágrenni við Egilsstaði. Vinirnir voru að skemmta sér þegar tvo ókunnuga menn bar að garði. Mennirnir voru töluvert eldri en Úlfur og vinir hans en þeir komu inn í bústaðinn og voru að spjalla við þau.

„Við vorum að leigja hérna bústað og vorum með svona lítinn hitting. Það mættu tveir menn sem eru mikið eldri en við, annar þeirra var helvíti slakur, það var hægt að tala við hann. Hinn var svona, ég ætla ekki að segja grimmur, en hann var eitthvað á flakki hérna í bústaðnum,“ segir Úlfur í samtali við DV.

Þegar stelpurnar í bústaðnum sögðu að annar maðurinn hafi verið óþægilegur við þær var ákveðið að reka þá út en þeir létu sér ekki segjast. „Stelpurnar komu og sögðu að hann hafi verið að snerta þær óþægilega svo við rákum hann út,“ segir Úlfur.

„Þeir neituðu að fara og hann byrjaði að hóta okkur. Síðan fórum við út og vorum að labba í áttina að honum og félagi hans kemur þá út úr bústaðnum þeirra með hlaðna haglabyssu. Hann hótaði okkur og sagði við okkur að hann væri með hlaðna byssu. Við tókum þessu ekki svo alvarlega því svona gerist bara aldrei.“

Mennirnir, sem eru á fertugsaldri, voru að sögn Úlfars á rjúpnaveiðum og voru að gista í bústað í nágrenni við bústaðinn sem Úlfur og félagar hans voru í.

Búið er að tilkynna lögreglunni um málið en Úlfur og vinir hans fóru í skýrslutöku í morgun, það var þá sem þau gerðu sér grein fyrir því hve alvarlegt þetta var.

„Við erum í smá sjokki eftir þetta, svona á ekki að gerast á Íslandi eða maður heldur það. Við vorum náttúrulega að drekka hérna í gær og það deyfði sjokkið þangað til í morgun en þá fórum við að gefa skýrslu niður á lögreglustöð og svoleiðis. Þá gerðum við okkur grein fyrir því hversu alvarlegt þetta var.“