Superior slf, félag sem skráð er fyrir húsbyggingu að Hraunhellu 19 á Selfossi, vann þann 3. nóvember skaðabótamál gegn sveitarfélaginu Árborg. Dómurinn var kveðinn upp í Héraðsdómi Suðurlands.

Þegar bygging hússins var langt komin kom í ljós að bílskúrsplata byggingarinnar stóð rétt tæpa 50 cm hærra en gert hafði verið ráð fyrir samkvæmt samþykktri teikningu. Þurfti eigandinn að ráðast í mjög kostnaðarsamar aðgerðir til að lækka bygginguna.

Byggjandinn stóð frammi fyrir því að annaðhvort rífa allt niður sem búið var að  byggja og byrja aftur frá grunni eða fara þá leið að saga í sundur sökkla hússins og lyfta upp kjallara og bílskúr sem búið var að steypa og grafa undan húsinu, þá 50 cm sem það hafi staðið of hátt, og slaka svo húsinu niður aftur. Valdi hann seinni kostinn og segir að kostnaðurinn af þeirri aðgerð hafi verið tæpar 17 milljónir króna.

Ágreiningurinn fyrir dómi snerist um það hver bæri ábyrgð á þessum mistökum, en Superior slf hélt því fram að húsbyggjandinn hefði í góðri trú byggt á upplýsingum og tilmælum frá þar til bærum fulltrúum sveitarfélagsins.

Dómurinn féllst á sjónarmið Superior slf en mat kostnaðinn sem af þessu hlaust lægri. Superios slf  krafðist tæplega 17 milljóna króna í skaðabætur frá Árborg en sveitarfélagið var dæmt til að greiða 10 milljónir í skaðabætur og 4 milljónir í málskostnað.

Dómurinn rekur þessa sögu ítarlega og má lesa hann hér.