„Nú um stundir grassera hér alls kyns hópar sem samanstanda af æstu og refsiglöðu fólki, aðallega konum, sem taka sér það vald að rétta yfir karlmönnum. Það er til marks um jafnvægisleysi þessa fólks að einn hópurinn kallar sig Öfgar – hann gæti allt eins kallað sig Ofstæki,“ segir Kolbrún Bergþórsdóttir, blaðamaður á Fréttablaðinu, í leiðara blaðsins í dag, þar sem hún fer hörðum orðum um Metoo-byltinguna. Hún segir hana hafa verið þarfa en telur að eftirköst hennar hafi orðið „alvarleg og ofsafengin og kostað mannfórnir“.

Kolbrún tiltekur ekki einstök dæmi en segir að umræðan sé orðin stjórnlaus því hægt sé að benda á hvern sem er og dæma viðkomandi sekan á grundvelli orðróms, þetta valdi ærumissi og stundum atvinnumissi. Hún telur að meirihluti þjóðarinnar vilji ekki lifa í slíku „sakbendingarþjóðfélagi“ enda viti flestir að stjórnlaus refsigleði eigi ekki við í siðuð þjóðfélagi.

Kolbrún spyr hvað hafi orðið um hófstillta umræðu, hvort hún eigi ekki erindi lengur. Hún gagnrýnir fjölmiðla fyrir að ala á þessari umræðu í leit sinni að fréttum með fyrirsögnum í upphrópanastíl. Hún segir að hófstillt fólk óttist að viðra skoðanir sínar í þessu andrúmslofti:

„Ekki er skrýtið þótt margir hvísli að sjálfum sér:Ég vil ekki búa í svona samfélagi. Því miður vilja ekki nógu margir segja þessi orð opinberlega af ótta við að vera úthrópaðir og fá á sig þann stimpil að styðja ofbeldismenn.“