Landsréttur staðfesti í gær úrskurð Héraðsdóms Reykjaness um að heimila lögreglu að leita í og skoða rafrænt innihald Samsung farsíma í eigu sakbornings í rannsókn lögreglu. Snýr rannsóknin meðal annars að brotum á ákvæðum laga um líkamsárás, umsáturseinelti og hótunarbrot.
Segir í úrskurðinum að lögreglunni hafi 23. október síðastliðinn borist tilkynning um að maður væri að ógna ökumanni vörubifreiðar. Ökumaðurinn sagðist ekki þora út úr bifreiðinni þar sem maðurinn hefði áður haft í hótunum við sig og sagt sig hafa verið að reyna við fyrrverandi kærustu sína.
Kvaðst vörubílstjórinn jafnframt hafa fengið frá hinum meinta eltihrelli „fullt af skilaboðum, raddskilaboðum, Facebook skilaboðum og fleira með hótunum en kærði hefði talað um að drepa hann, hótað honum líkamsmeiðingum og fleira […].“ Svo fór að viðtakandi hótananna þurfti að lokum að loka á manninn á samfélagsmiðlum.
Meðal hótananna sem bárust voru: „síðasti aðili sem að sveik mig svona, ég kveikti í bílnum hans.“
Þá snýr rannsókn lögreglu einnig að ofbeldisbrotum, en eltihrellirinn meinti er sagður hafa stokkið upp á vörubifreið mannsins og teygt sig inn um rúðuna og veitt brotaþola sínum samtals 7-8 högg.
Fram kemur í úrskurðinum að maðurinn hafi áður hlotið dóma fyrir ofbeldisbrot, síðast í mars er hann játaði brot gegn barnsmóður sinni og börnum þeirra, auk brota á barnaverndarlögum. Þá var hann dæmdur fyrir að hafa kveikt í bifreið, en það má sé nú í áfrýjunarferli fyrir Landsrétti.
Fulltrúi lögreglu hélt því fram fyrir dómi að lögreglan teldi rökstuddan grun til að ætla að farsími mannsins, umræddur Samsung sími, hafi að geyma samskipti, myndir og fleira sem skipt geti mál fyrir rannsókn og úrlausn málsins fyrir dómi.
Dómarar í bæði Héraðsdómi Reykjaness og Landsrétti tóku undir þetta mat lögreglu, enda var, sem fyrr segir, lögreglu veitt heimild til þess að opna farsíma mannsins og skoða innihald hans.
