Klukkan 22.20 í gærkvöldi var tilkynnt um rán á veitingastað í Grafarvogi. Þar opnaði maður sjóðvél og tók peninga. Starfsmaður sá til hans og otaði maðurinn þá eggvopni að honum. Hann hljóp síðan á brott. Málið er í rannsókn.

Í Garðabæ var ekið á 9 ára dreng á reiðhjóli á sjötta tímanum í gær. Drengurinn var aumur í hnjám og fór af vettvangi með móður sinni.

Á sjöunda tímanum var ekið á konu í Miðborginni. Hún hlaut áverka á hendi.

Á níunda tímanum missti ung kona stjórn á bifreið sinni í Mosfellsbæ og ók út af. Hún fann til eymsla í öxl og var flutt með sjúkrabifreið á slysadeild.

Á áttunda tímanum var tilkynnt um eld í bifreið í Vesturbænum. Slökkvilið slökkti eldinn sem kom frá vélinni. Bifreiðin var fjarlægð með dráttarbifreið.

Einn ökumaður var kærður fyrir að aka sviptur ökuréttindum í gærkvöldi. Annar var handtekinn grunaður um að vera undir áhrifum fíkniefna.