„Þetta er að sjálfsögðu ömurlegt,“ segir Daníel Dimitri í samtali við vefmiðilinn 24 – Þínar fréttir – en Daníel segist vera gæsaskyttan sem Baldur Eiðsson, húsasmíðameistari og hrossaræktandi í Lindartúni í Landeyjum, hefur sakað um að hafa skotið tvö hross í eigu hans.
Komið hefur fram í fjölmiðlum að lögregla telur að hrossin hafi látist af náttúrulegum orsökum.. Baldur dregur þá niðurstöðu í efa. Hann fann hrossin dauð á túni sínu í síðustu viku. Segir hann blóð hafa runnið úr nösum hrossanna og blóð hafi verið á brjóstkassa þeirra.
„Þessi bóndi er alltof mikið að blása upp þetta mál. Ég og hópurinn minn höfum verið að veiða gæsir þarna í fimm ár. Það kemur oft upp eitthvað svona þar sem við erum sökuð um að drepa ein eða önnur dýr, sem eru ekki gæsir en þetta voru ekki við. Ég finn til með þessum bónda, enda agalegt að missa svona hrossin sín, en rétt skal vera rétt,“ segir Daníel í samtali við 24.
