Þann 29. júní á þessu ári greindi DV frá því að maður hefði ruðst inn á kaffistofu Samhjálpar í Borgartúni. Maðurinn var vopnaður skammbyssu og hafði í hótunum við gesti á staðnum.
Lögreglu var þegar gert viðvart um málið. Þegar hana bar að garði hafði hinn vopnaði lagt á flótta. Var hann handtekinn skömmu síðar og hald lagt á vopnið.
Í síðustu viku var maðurinn sem um ræður dæmdur í þriggja ára fangelsi. Friðrik Smári Björgvinsson aðstoðarsaksóknari staðfesti þetta í samtali við mbl.is.
Skammbyssan var þó hlaðin þegar maðurinn var handtekinn en hann hélt því fram fyrir dómi að hann hefði hlaðið byssuna rétt áðr en hann var handtekinn. Þar sem ákæruvaldinu tókst ekki að sanna að byssan hafi verið hlaðin þegar hann ógnaði fólki með henni var talið í dómnum að hún hafi verið óhlaðin. Þá var hann sýknaður af því að hafa hótað almenningi með byssunni.
Þá segir einnig í frétt mbl.is að maðurinn hafi neitað að hafa beint byssunni að lögreglumönnum og almennum borgurum. Maðurinn játaði þó að hafa beint byssunni að einum manni á kaffistofu Samhjálpar en hafnaði því að hann hafi beint henni að öðrum manni sem sagði hann hafa beint henni að sér.
Maðurinn var ekki bara dæmdur í þriggja ára fangelsi heldur var hann einnig sviptur ökuréttindum ævilangt vegna brota sinna á umferðalögum og fíkniefnalögum en hann hafði verið gripinn við að keyra undir áhrifum fíkniefna og játaði þau brot fyrir dómi.
Athygli vakti að þessi sami maður hafði ráðist á mann með hnífi á Sushi Social fyrr á árinu. Maðurinn hefur þó enn ekki verið ákærður fyrir þá árás.
