Lögreglan á Vesturlandi hefur nú lokið rannsókn vegna kæru Karls Gauta Hjaltasonar á endutalningunni í Norðvesturkjördæmi og mun málið vera komið til ákærusviðs. Frá þessu greinir Vísir sem hefur það eftir áreiðanlegum heimildum að allir meðlimir yfirkjörstjórnar hafi stöðu sakbornings í málinu.

Sakborningur er sá maður hefur verið borinn sökum eða er grunaður um refsiverða háttsemi. Staða sakbornings felur ekki í sér neina yfirlýsingu um sekt, það þýðir aðeins að við rannsókn sé verið að kanna hvort viðkomandi hafi gerst sekur um brot. Staðan tryggir líka viðkomandi ákveðin réttindi, svo sem rétt til upplýsinga og rétt til verjanda.

Ingi Tryggvason, formaður kjörstjórnar vildi ekkert tjá sig um málið er Vísir leitaði viðbragða hans.

„Ég ætla nú ekkert að tjá mig um þetta. Þetta mál er bara hjá lögreglu og ég gef engar upplýsingar um það, enda hef ég ekki heimildir til þess.“

Hann segir málið ekki hanga sérstaklega yfir honum. Málið sé komið úr höndum kjörstjórnar og kjörstjórn hafi ekkert um málið að segja. Aðspurður um líðan svaraði hann:

„Ég get nú ekki sagt annað en að mér líði ágætlega. Bara að sinna minni vinnu, ég er ekkert að hugsa um þetta.“