Maður sem virtist hafa sent skilaboð sem sýndu viðurstyggilegt kynþáttaníð og mannhatur á frambjóðanda Pírata, Lenyu Rún Taha Karim, segist saklaus, og vera þolandi ósmekklegs hrekks.

Sjá einnig: Frambjóðandi Pírata fékk yfir sig gróft kynþáttahatur í einkaskilaboðum

Lenya Rún Taha Karim, sem komst inn á þing fyrir Pírata en missti þingsæti sitt við endurtalningu atkvæða í Norðvesturkjördæmi, eftir nýafstaðnar alþingiskosningar, birti í gærkvöld á Twitter gífurlega hatursfull einkaskilaboð sem hún fékk frá manni einum, eftirfarandi:

DV reyndi að ná sambandi við umræddan mann í morgun og sendi honum skilaboð, en nafn hans finnst ekki í símaskrá. Maðurinn svaraði skilaboðunum í eftirmiðdaginn og segist hann ekki hafa sent þessi hatursskilaboð á Lenyu heldur sé um að ræða hrekk í hans garð frá öðrum manni.

„Ég sendi þetta ekki,“ segir maðurinn í svari sínu til DV. Sýndi hann síðan DV skjáskot af skilaboðum sem hann sendi til Lenyu í dag þar sem hann skýrir út að hann sé ekki maðurinn sem sendi henni umræddan hroða. Ákveðinn maður hafi sent honum skjáskot af þessu efni og sá hafi greinilega sent þetta í hans nafni. Í skilaboðum til Lenyu segir hann: „Það var ekki ég heldur einhver sem ætlaði að vera „fyndinn“ á minn kostnað og skrifar þetta rusl og sendir á þig.“

Hann segir ennfremur: „Ég að sjálfsögðu eyddi þessu öllu sem var sent til þín á undan, ég er að óska þér góðs gengis og vona að þú komist á þing. Ömurlegt hvernig fólk getur verið.“

Í svari sínu til DV segir maðurinn ennfremur: „Þetta er sannleikurinn.“