Nestlé, framleiðandi Quality Street konfekt-kassanna sem Íslendingar kalla yfirleitt Mackintosh, segir að framleiðsluvandamál geti haft slæm áhrif á dreifingu konfektsins vinsæla fyrir jólin.

„Eins og önnur fyrirtæki þá erum við að sjá skort á starfskröftum og svo eru einnig smá dreifingarvandamál,“ segir Mark Schneider, framkvæmdastjóri Nestlé, í samtali við Guardian um málið. Mark segir þá að það sé núna forgangsmál að koma vörunum í verslanir og að verið sé að vinna hart með söluaðilum til að sjá til þess að það náist.

Nestlé gaf stuttu síðar út yfirlýsingu þar sem fyrirtækið fullyrti að það yrði nóg af Quality Street konfekti gert fyrir alla um þessi jól. „Verksmiðjan okkar í Halifax er að framleiða allt að 12 milljón Quality Street konfektmola á dag,“ segir meðal annars í tilkynningunni.

Í hugum fjölmargra Íslendinga eru Quality Street-molarnir órjúfanlegur hluti jólahátíðarnar og því ljóst að allur vafi um framboð á góðgætinu er kvíðvænlegt í meira lagi. Það er því ljóst að íslenskir sælkerar munu vakta þróun mála hjá Nestlé.