Stjórnmálaleiðtoginn Glúmur Baldvinsson hyggst sækja Sindra Þór Hilmars – og Sigríðarson, femínista og markaðsstjóra, til saka fyrir svæsin ummæli sem hinn síðarnefndi lét falla á Twitter-síðu sinni fyrr í dag.
Sindri Þór hefur í nógu að snúast varðandi yfirvofandi kröfur og kærur því hann var einn fimm einstaklinga sem fengu kröfubréf frá Ingólfi veðurguð Þórarinssyni fyrr í sumar. Þá hefur vín- og gullsalinn Sverrir Einar Eiríksson einnig sent Sindra kröfubréf þar sem meiðyrðamálsókn er hótað vegna ummæli á samfélagsmiðlinum.
Allt er þegar þrennt er og nú virðist Glúmur ætla að bætast við hina heilögu þrenningu sem sækja ætla femínistann til saka.
Allt byrjaði þetta út af yfirlýsingu Glúms, vígmóðum eftir Alþingiskosningarnar, þar sem hann tilkynnti að næsti bardagi hans og skoðanasystkina yrði um stjórnartaumana í höfuðborginni. „Kæru vinir, tíminn líður hratt og því þarf að hefja undirbúning fyrir orrustuna um Reykjavíkurborg hið fyrsta,“ skrifaði Glúmur á Facebook-síðu sína.
„Í bígerð er að stofna flokk sem mun kallast Flokkurinn (enn þá bara vinnunafn, hann má kallast allt annað enda ákveðið af flokksmönnum),“ skrifaði leiðtoginn.
Stefna Flokksins yrði að berjast gegn réttrúnaði, skorti á húsnæði fyrir lítt efnað fólk og ungt fólk, sóun á almannafé borgarbúa og síðast en ekki síst að hefja viðspyrnu gegn hugmyndum um að útrýma einkabílnum.
Síðasta baráttumálið virtist þó æsa andstæðinga Glúms upp.
„Ég óska sérstaklega eftir að fá til liðs við flokkinn þá karlmenn sem hafa verið kúgaðir af femínisma,“ skrifaði Glúmur ennfremur í herkvaðningunni.
Að minnsta kosti fór þetta í taugarnar á Sindra Þór Hilmars- og Sigríðarsyni, sem starfar eins og áður segir sem markaðsstjóri Tjarnarbíós, sem er í eigu Reykjavíkurborgar.
„Já, hann er sonur pabba síns, blessaður. Ætli hann hafi líka skrifað grafískar lýsingar til barns um að ríða konunni sinni, já eða níðst á dóttur sinni, eða áreitt konur, eða…
Djöfull eru þeir feðgar, Glúmur og Jón Baldvin, ómerkilegir,“ skrifaði Sindri á Twitter-síðu sína.
Við þessum níðskrifum brást Glúmur hinn versti við.
„Kæru vinir, um leið og ég viðraði þann möguleika að berjast gegn núverandi borgarstjórn réttrúnaðar og ofbeldisfemínisma skrifar maður að nafni Sindri Þór Hilmars-Sigríðarsson eftirfarandi status að neðan um mig og mína fjölskyldu. Og dóttur. Sigríðarson starfar sem markaðsstjóri Tjarnarbíós. Sem er styrkt af Degi Eggertssyni borgarstjóra. Og borgarstjórn er full af fólki sem þessum eins og Hildi Lillendahl sem dreifa viðbjóði um landsmenn án þess að borgarstjóri láti það sig varða,“ skrifaði Glúmur og virtist færast allur í aukanna.
„Þessi ummæli gera mig enn ákveðnari í að blása til framboðs og sóknar gegn vitfirringunni og ofbeldinu sem þar fær að líðast. Það er einsog borgarstjórn sanki að sér svona liði til starfa. Ég læt ekki tala svona um mig og dóttur mína án þess að sækja viðkomandi til saka og spurja kunningja minn og borgarstjóra Dag Eggertsson hvort honum þyki þetta í boði.Hér að neðan má sjá hvað maðurinn styrktur af borgarstjóra sagði um mig og mína fjölskyldu og einkadóttur.“
Já, hann er sonur pabba síns, blessaður. Ætli hann hafi líka skrifað grafískar lýsingar til barns um að ríða konunni sinni, já eða níðst á dóttur sinni, eða áreitt konur, eða…
Djöfull eru þeir feðgar, Glúmur og Jón Baldvin, ómerkilegir. pic.twitter.com/A8A5yFeESW
— Sindri Þór (@sindri8me) September 29, 2021
