Togarinn Ernir, sem leigður er út af Íslendingum en siglir undir þjóðfána Afríkuríkisins Belís, hefur nú verið kyrrsettur við höfnina í Las Palmas, höfuðborginni á Gran Canary, vegna ammóníaksleka sem kom upp í skipinu. Frá þessu greindi miðillinn Spanishports í gær.
Slökkvilið var kallað til vegna slyssins og eru tveir menn sagðir hafa slasast lítillega vegna lekans, fengu brunasár.
Samkvæmt frétt Stundarinnar frá því í desember er togarinn gerður út í Namibíu og hafa útgerðarmaðurinn Jakob Valgeir Flosason og fyrrverandi starfsmaður Glitnis banka, Elmar Svavarsson, leigt togarann út. Útgerðarstjóri skipsins er Hlynur Þórisson og staðfesti hann frétt spænska hafnarfréttamiðilsins í samtali við DV.
Hafnaryfirvöld í borginni hafa kyrrsett Erni en samkvæmt Hlyni átti skipið að vera við byggju hvort eð er í gær og dag en það lagðist til hafnar í Las Palmas. Hafa skal í huga að borgin Las Palmas er annar staður en eyjan La Palma þar sem núna er mikið eldgos í gangi.
Hlynur segir í samtali við DV að ákveðin skilgreind viðbragðsáætlun fari í gang þegar atvik af þessu tagi eigi sér stað. „Staðan er bara þannig að það virðist koma upp einhver leki af ammoníaki og þá fer bara ákveðið prótókoll í gang. Það er bara tryggt öryggi allra. Það urðu þarna smávægileg meiðsl á slökkviliðsmanni en ég hef ekki nánari upplýsingar um það, nema að þetta hafi verið eitthvað lítilsháttar. Það eru allir heilir. Þannig að það er allt í góðu,“ segir Hlynur.
Hann segir að loftræsta þurfi skipið og sú vinna sé í gangi núna. „Það er í raun ekki mikið meira um þetta segja núna,“ segir Hlynur.
Aðspurður um tjón segir hann: „Að sjálfsögðu er alltaf tjón þegar svona gerist en ég get ekki svarað því hvert umfang þess er, þetta fer bara allt í allt ferli.“
Hlynur segir skipið hafa komið til Las Palmas á laugardag úr veiðiferð. „Sem betur fer sluppu allir og það er fyrir öllu,“ segir Hlynur. „Svo fer bara prótókollinn í gang hvað varðar athugun á vélbúnaði og öðru en aðalatriðið er að allir eru heilir.“
Hlynur segist aðspurður ekki vita fyrir víst hvort lekinn hafi valdið einhverjum umhverfisspjöllum á staðnum. Hann telji það þó mjög ólíklegt miðað við umfang aðgerðanna sem nú eru í gangi.
Hér fyrir neðan er myndband sem Spanishports birti af togaranum Erni:
