Kosningabarátta Áslaugar Örnu Sigurbjörnsdóttur, dómsmálaráðherra, í prófkjöri Sjálfstæðisflokksins í Reykjavík kostaði rúmar 8,7 milljónir króna. Þetta kemur fram í uppgjöri prófkjörsins sem er aðgengilegt á vef Ríkisendurskoðunar.
Eins og alþjóð veit hafnaði Áslaug Arna í öðru sæti prófkjörins og laut þar með í lægra haldi í leiðtogaslagnum gegn Guðlaugi Þór Þórðarsyni utanríkisráðherra. Guðlaugur Þór hefur ekki enn skilað inn uppgjöri vegna kosningabaráttu sinnar en frestur til þess er liðinn.
Stjórnmálamönnum ber að skila inn uppgjöri eða yfirlýsingu um að kostnaður þeirra vegna persónukjörs innan þriggja mánaða frá því að prófkjör fer fram.
Í uppgjöri Áslaugar Örnu kemur fram að styrkir fyrirtækja námu rúmum 2,8 milljónum króna en styrkir einstaklinga námu um 5,9 milljónum króna.
Hámarksstyrkur sem fyrirtæki getur veitt eru 400 þúsund krónur og aðeins tveir slíkir styrkir litu dagsins ljós. Frá Juris slf. og Ness Management Consulting ehf. Hið fyrrnefnda er rekstarfélag samnefndrar lögfræðistofu en Sigurbjörn Magnússon, faðir Áslaugar Örnu, er einn eigenda hennar. Ness Management Consulting ehf. er í eigu Tómas Márs Sigurðssonar, forstjóra HS Orku.
Fyrirtæki sem studdu Áslaugu Örnu:
Juris slf. – 400.000
Ness Management Consultin ehf. – 400.000
Pure Management ehf. – 155.000
M ehf. – 200.000
Íslyft ehf. – 150.000
Steinbock-þjónustan ehf. – 150.000
Seaproducts Iceland ehf. – 150.000
Dalborg hf. – 300.000
Lögmenn Árbæ slf. – 100.000
Rock Holding ehf. – 300.000
Lýsi hf. – 250.000
Fons Juris ehf. – 250.000
Samtals: 2.805.000
