Eliza Reid forsetafrú má samkvæmt öruggum heimildum DV eiga von á því að verða kölluð inn af lögreglunni á höfuðborgarsvæðinu til skýrslutöku, hafi það ekki þegar verið gert, vegna rannsóknar lögreglunnar á kynferðislegri áreitni sem kærð hefur verið til lögreglu.
Líkt og greint var frá í morgun kærði fyrrverandi starfsmaður forsetaembættisins kynferðislega áreitni samstarfsmanns hjá embættinu. Gagnrýndi maðurinn viðbrögð embættisins við áreitinu sem urðu að endingu til þess að hann hrökklaðist úr starfi og flutti frá Bessastöðum. Málin eru sögð teygja sig aftur til ársins 2015 en áreitnin náð hámarki í starfsmannaferð til Parísar árið 2018. Þá hafi meintur gerandi brotið bæði á kæranda í umræddu máli, sem og öðrum, og verið sendur í leyfi.
Í viðtali við Fréttablaðið í morgun gagnrýnir þolandinn harðlega að meintur gerandi hafi fengið að snúa til baka í starfið sitt.
DV fjallaði um málið síðast síðastliðið sumar.
