Á fjórða tímanum í nótt var tilkynnt um grunsamlegar mannaferðir á byggingasvæði í Laugardalshverfi. Þar var 16 ára piltur handtekinn en hann var að reyna að brjótast inn í gáma. Hann var fluttur á lögreglustöð og hringt í móður hans og síðan var honum ekið heim. Barnaverndaryfirvöld fengu tilkynningu um málið.

Á fyrsta tímanum í nótt var bifreið ekið í veg fyrir aðra á Hafnarfjarðarvegi í Kópavogi. Annar ökumaðurinn var ekki með gild ökuréttindi og nagladekk voru undir bifreiðinni sem hann ók.

Þrír ökumenn voru handteknir í gærkvöldi og nótt grunaðir um að vera undir áhrifum áfengis og/eða fíkniefna.

Í gærkvöldi var ökumaður kærður fyrir að aka með 2 farþega í farangursgeymslu bifreiðar. Hann greiddi sektina á staðnum.