Öryggisnefnd Flugfreyjufélags Íslands (FFÍ) hefur sent Icelandair bréf vegna félagsmanna sem þora ekki að tilkynna veikindi sín, og sleppa því jafnvel, vegna ótta um framtíðarstöðu sína innan fyrirtækisins.

Samkvæmt heimildum DV er allt á suðupunkti innan félagsins vegna málsins.

Í færslu sem Guðlaug Líney Jóhannsdóttir, formaður FFÍ, birti í lokuðum hópi fyrir félagsmenn segir að fólk hafi leitað til þeirra vegna málsins og að fólk væri að mæta veikt til vinnu vegna stöðunnar. Einnig kemur fram að það eigi bæði við um skammtíma- og langtímaveikindi.

Í umræddum hópi eru um það bil 1500 meðlimir, þar af rúmlega 500 sem starfa fyrir Icelandair.

Öryggisnefndin vill viðbrögð frá Icelandair, og bendir á að veikir starfsmenn sem sjá um að sinna öryggi farþega ógna öryggi þeirra sem séu um borð, hvort sem það séu aðrir starfsmenn eða farþegar.

Hér að neðan má sjá tilkynninguna sem DV hefur undir höndum:

„Öryggisnefnd FFÍ vill koma á framfæri Þungum áhyggjum og vekja athygli á Því að félagsmenn okkar sem starfa hjá Icelandair hafa leitað til stéttarfélagsins vegna ótta við að tilkynna veikindi til fyrirtækisins. Einnig hafa okkur borist athugasemdir um að félagsmenn mæta veikir í vinnuna vegna Þessa. Ástæða sem félagsmenn gefa upp er hræðsla um að tilkynning um veikindi kunni að hafa áhrif á framtíðarstöðu þeirra í starfi. Þetta á bæði við um skammtíma- og langtímaveikindi.

Öryggisnefnd óskar eftir viðbrögðum frá lcelandair og aðhafist vegna þessa. Það er ljóst að veikir starfsmenn sem sinna öryggi farþega um borð ógna öryggi samstarfsmanna sinna sem og viðskiptavina Icelandair.“