Fyrrverandi upplýsingafulltrúi Umhverfisstofnunar, Björn Þorláksson, hefur stefnt íslenska ríkinu fyrir meinta ólögmæta niðurlagningu á starfi hans. Krefst hann 23 milljóna sem samanstanda af tveggja ára launum og miskabótum. RÚV greindi frá.

Málið var tekið fyrir í Héraðsdómi Reykjavíkur í gær.

Í stefnu Björns á ríkið kemur fram að honum hafi verið tilkynnt um það í upphafi árs 2017 að starf hans yrði lagt niður.  Rúmum mánuði síðar hafi Umhverfisstofnun auglýst laust til umsóknar starf sérfræðings í stafrænni þróun, fræðslu og miðlunar. Björn telur að verkefnalýsing þess starfs hafi verið sú sama og gilti fyrir hans eigið starf sem upplýsingafulltrúi, sem lagt var niður.

Björn segir að ekki hafi þurft að grípa til svo harkalegra aðgerða við að leggja niður starf hans en þessi ákvörðun hafi reynst honum afar íþyngjandi.

Ekki kemur fram í endursögn RÚV á stefnunni nákvæmlega hvernig Umhverfisstofnun á að hafa brotið lög með ákvörðun um að leggja starf Björns niður, en þó segir:

„Björn telur að ákvörðun Umhverfisstofnunar um leggja niður starf hans hafi verið ólögmæt. Forsendurnar fyrir þeirri ákvörðun hafi verið hreinn fyrirsláttur því uppsögn hans hafi verið löngu áformuð.“