Flugleiðahótel hf. var í gær í gær gert með dómi að bera 2/3 ábyrgð á vinnuslysi sem varð í eldhúsi Icelandair hótelsins við Reykjavíkurflugvöll, Hotel Natura. Dómurinn féll í Héraðsdómi Reykjavíkur.
Konan sem lenti í slysinu hafði starfað á hótelinu í fimm ár og var verkstjóri á þeim tíma er slysið varð. Meðal verkefna konunnar voru hefðbundin verk í eldhúsi, þar með talið framleiðsla á veitingum vegna veisla og erfidrykkja. Rétt fyrir hádegi í lok febrúar 2019 var konan að skera niður roast beef í rafknúnum áleggshníf að Sirman sort inni í eldhúsi hótelsins. Tekist var á um það hvort öryggishlíf sem átti að vera framan á sleða tækisins hafi verið til staðar þegar slysið varð.
Fyrir dómi hélt konan því fram fyrir dómi að tækið hafi verið vanbúið og því beri hótelið ábyrgð á slysinu. Fyrir dóm komu kollegar konunnar úr eldhúsi hótelsins sem allir staðfestu að umrædd hlíf hafi verið fjarlægð þar sem hún hafi brotnað og því ekki verið til staðar. Þá fékk konan vinkonu sína til þess að taka ljósmynd af tækinu eftir að hún hætti sem lögð var fyrir dóminn. Þrátt fyrir það, er það nefnt í dómnum að ekki liggi fyrir með óyggjandi hætti hvort að hlífin hafi verið til staðar eða ekki. Engu að síður var það mat dómsins, sem skipaður var sérfróðum meðdómsmanni, að hefði hlífin verið til staðar, hefði slys af því tagi sem um ræddi verið svo til ómögulegt. „Þegar af þessari ástæðu telur dómurinn að stefndi beri skaðabótaábyrgð á tjóni stefnanda vegna slyssins,“ segir í dómnum.
Hins vegar féllst dómari einnig á varakröfu Flugleiðahótela hf. þar sem hótelkeðjan hélt því fram að konan hefði sýnt af sér stórkostlegt gáleysi við sneiðingu roast beefsins. Konan var með mikla reynslu af verkfærinu og átti því að hafa næga þekkingu á hnífnum og notkun hans til þess að geta unnið með hnífinn örugglega. Var því bótaréttur konunnar skertur um þriðjung, og Flugleiðahótel hf. dæmt til að bæta tjón konunnar um tvo þriðju.
Ekki liggur enn fyrir hvert tjón konunnar er nákvæmlega, en í skýrslu bæklunarlæknis fyrir dómi kom fram að konan hafi sagst finna til í fingrum í hita og kulda, að hún hafi vaknað með verki í fingrum og að þeir væru dofnir. Ekki væri þó um skerðingu á hreyfigetu að ræða.
Þá skal hótelkeðjan greiða konunni 1,2 milljónir í málskostnað.
