Íslenskum nasistum sem heyra til íslandsarms norrænu mótstöðuhreyfingarinnar hefur verið gert að breyta léni vefsíðu sinnar eftir að ný lög voru samþykkt um íslensk landshöfuðlén. Stundin greindi fyrst frá málinu.

Áður var vefsíðan nordurvigi.is en er nú nordurvigi.net.

Samkvæmt nýju lögunum er stjórnvöldum heimilt að loka eða haldleggja skráð lén undir íslensku landshöfuðsléni. Sú heimild byggist á ákveðnum skilyrðum svo sem ef rétthafi síðu eða tengdur aðili hafi náin tengsl við skipulagða brotastarfsemi, ef síðan er notuð til að miðla ólöglegu efni eða efni sem hvetur til refsiverðrar háttsemi.

Ríkharður Leó Magnússon, foringi íslandsarms norrænu mótstöðuhreyfingarinnar, segir í færslu á nordurvigi.net að eftir lagabreytinguna hafi nordurvigi.is verið lokað og engin ástæða gefin fyrir því.

„Íslandsarmur Norrænu mótstöðuhreyfingarinnar þurfti nauðsynlega að breyta léni vefsíðunnar nordurvigi.is yfir í nordurvigi.net núna á sunnudaginn. Þetta var vegna laga sem að ríkisstjórn Íslands samþykkti þar sem ríkið hafði forkaupsrétt á alla hluti fyrirtækisins, Internet á Íslandi hf. sem reka landslénið .is.

Lögin voru samþykkt af þinginu þann 18. maí og fólu þeim algjör völd yfir .is lénum. Geta nú stjórnvöld landsins fengið yfirvaldið til að loka á hverja þá síðu þegar þeim þóknast. Með hroka sínum tókst þeim að slökkva á nordurvigi.is léninu án nokkurrar ástæðu og án þess að hafa samband við okkur varðandi það:“

Segir hann þessa framgöngu sýna að á Íslandi ríki ekki lengur málfrelsi.

„Áður hafði Ísland verið fylgjandi málfrelsis en nú virðist það vera liðin tíð. Nokkrir fyrrverandi notendur .is lénsins voru; The Daily Stormer, samtök Íslams ríkis, Pirate Bay og Peyton Manning„

Ríkharður segir að á vefsíðunni nordurvigi.is hafi ávallt verið gott efni sem ekki hefur brotið gegn neinum lögum. Eina ástæðan fyrir því að að síðunni hafi verið lokað hljóti því að vera pólitísk.

„Á síðu nordurvigi.is var ávalt gott efni sem stangaðist aldrei gegn neinum lögum, öll okkar skrif voru öguð og án slæms málfars, svo að ástæðan fyrir að taka niður síðuna hlýtur að byggjast á því að þeim líki ekki við pólitísku sýn Norrænu mótstöðuhreyfingarinnar. Eða eins og ein athugasemd frá einum okkar varðandi þetta: ,,Þeim er líklegast illa við okkur því að við höfum rétt fyrir okkur og þeir hafa rangt fyrir sér.”.“