Heiðar Örn Sigurfinnsson, varafréttastjóri Ríkisútvarpsins, gefur lítið fyrir afsökunarbeiðni Samherja sem fyrirtækið gaf út í gær þar sem beðist var afsökunar á harðri framgöngu útgerðarinnar í kjölfar Samherjamálsins. Segir hann óljóst hver það er sem er að biðjast afsökunar, á hverju afsökunar er beðist og til hvers beiðninni sé beint.

„Með afsökunarbeiðni Samherja kveður við nýjan tón úr þeirri áttinni og það er gott, vonandi verður framhald þar á. Það er þó aðallega (en ekki eingöngu) þrennt við afsökunarbeiðnina sem truflar,“ skrifar Heiðar á Facebook.

Til að byrja með segir hann óljóst hver það er sem biðst afsökunar. Er það útgerðin öll, forstjórinn Þorsteinn Már Baldvinsson eða stjórnendur?

„Í fyrsta lagi er ekki mjög skýrt hver er að biðjast afsökunar. Það er enginn skrifaður fyrir þessari afsökunarbeiðni – einungis sagt að Samherji vilji biðjast afsökunar á framgöngu ótilgreindra stjórnenda fyrirtækisins. Hvers vegna eru það ekki stjórnendurnir sjálfir sem biðjast afsökunar á framgöngu sinni?“

Einnig sé óljóst a hverju afsökunar er beðist.

„Í öðru lagi er ekki mjög skýrt á hverju er beðist afsökunar. Þar segir eingöngu að það sé ljóst að of langt hafi verið gengið í harkalegum viðbrögðum við „neikvæðri umfjöllun“ og á þeirri framgöngu vilji fyrirtækið biðjast afsökunar. Hvaða harkalegu viðbrögð er átt við? Eru það myndböndin sem framleidd voru þar sem fréttamenn Kveiks voru meðal annars sakaðir um að falsa skjöl til stuðnings umfjöllun sinni? Eru tilraunir til að hafa af fjölmiðlafólki æruna? Er það „spæjarinn“ sem elti Helga Seljan á röndum, sat fyrir honum á kaffihúsi og sendi ógnandi sms? Eru það njósnir um aðra fjölmiðlamenn og listamenn? Er það kannski allt þetta eða eitthvað annað sem ekki hefur komið fram í opinberri umræðu?“

Að lokum sé ekki ljóst að hverjum þessi afsökunarbeiðni beinist.

„Í þriðja lagi er ekki mjög skýrt hvern er verið að biðja afsökunar þar sem það er óljóst á hverju er beðist afsökunar. Er verið að biðja Helga Seljan afsökunar? Eða allan almenning? Eða kannski bara starfsfólk Samherja?“

Líklega hefði betur mátt standa að þessari afsökunarbeiðni.

„Kannski hefði þessi afsökunarbeiðni verið betri ef það væri skýrara hver væri að biðja hvern afsökunar og á hverju. Eins og fram kom í frétt RÚV í kvöld þá vildi forstjóri Samherja ekki veita viðtal til að skýra það. Ekki frekar en hann hefur viljað veita viðtöl til að svara þeim ásökunum sem settar hafa verið fram“