59 ára gamall karlmaður búsettur á Íslandi hefur verið ákærður fyrir stórfellt fíkniefnalagabrot með því að hafa flutt inn 1.560 ml af amfetamínvökva, eða amfetamínbasa sem sagt er hafa verið ætlað til söludreifingar hér á landi í ágóðaskyni.

Efnin dulbjó maðurinn sem vín í vínflösku og faldi í farangri sínum sem hann innritaði í flugvél flugfélagsins Norwegian sem flaug með manninn frá Barcelona til Keflavíkur. Á Keflavíkurflugvelli fundu tollverðir efnin við leit í farangri mannsins.

Úr amfetamínbasa er amfetamínnítrat unnið, en það er amfetamín í duft formi sem selt er á götum úti. Undanfarna mánuði hafa fallið þungir dómar yfir mönnum sem staðnir hafa verið að verki við að breyta amfetamínbasa í amfetamínduft og þá fyrir amfetamínframleiðslu. Oftar en ekki eru það erlend nöfn sem tengjast þeim málum og hefur það vakið upp spurningar um hvort erlendir glæpahringir séu búnir að ná fullum tökum á innlendum spíttmarkaði.

Um það hefur svo verið tekist hvort það teljist framleiðsla, að breyta amfetamíni í amfetamín. Samkvæmt nýjustu niðurstöðu Héraðsdóms Reykjavíkur telst svo vera, en þeirri niðurstöðu hefur verið áfrýjað til Landsréttar.

Héraðssaksóknari sækir málið og gerir saksóknari embættisins kröfu um að maðurinn verði gert að sæta refsingu og greiða allan sakarkostnað sem af málinu hlýst. Þá er upptöku amfetamínbasans krafist.