Aðalmeðferð í máli karls sem ákærður var fyrir hrottalega árás og vörslu mikils magns fíkniefna í fjölbýlishúsi snemma árs 2019 fór fram í Héraðsdómi Reykjavíkur í vikunni. Maðurinn neitaði sök. Von er á að dómur verði kveðinn upp yfir manninum á næstu vikum.

Héraðssaksóknari, sem sótti málið, ákærði manninn í mars fyrir sérstaklega hættulega líkamsárás með því að hafa ráðist á annan mann og stungið hann ítrekað í höfuð og líkama með dekkjasíl. Hlaut fórnarlamb árásarinnar skurði og stungusár yfir hægri augabrún, á vinstra eyra, á bak og neðan við herðablað.

Fórnarlambið krefst tveggja milljóna í bætur fyrir miska og skaða sem hann varð fyrir vegna árásarinnar.

Þá er meintur árásarmaður jafnframt ákærður fyrir vörslu talsverðs magns fíkniefna sem fundust við leit lögreglu eftir að hún var kölluð til vegna árásarinnar. Efnin, 24 grömm af maríhúana og 5 grömm af amfetamíni eru sögð hafa fundist á manninum. Enn fremur segir í ákærunni að lögregla hafi fundið 16 grömm tæp af amfetamíni, 2 grömm af MDMA auk níu E-taflna í glæru plastboxi í stigagangi fjölbýlishússins þar sem áflogin brutust út. Er maðurinn ákærður fyrir að hafa átt þetta allt saman. Þá kemur fram í gögnum málsins að lögregla krefjist haldlagningar á „Proscale SIM-300“ vog, og má gera ráð fyrir að vogin hafi tengst hugsanlegri sölu á fíkniefnum.

Verði maðurinn fundinn sekur gæti hann átt yfir höfði sér þungan fangelsisdóm auk greiðslu bóta og annars málskostnaðs.