Blaðamaðurinn Jakob Bjarnar Grétarsson segir að Samherja-„þátturinn“ sem birtist síðastliðin þriðjudag á YouTube-rás útgerðarfyrirtækisins, brjóti á bága við eina helstu siðareglu blaðamanna. Þetta kemur fram í færslu sem að Jakob birti á Facebook-síðu sinni. Þar segir hann að málið, burtséð frá innihaldi þess sýni fram á „ferlegt ástand“
„Burtséð frá málinu sjálfu, efnisatriðum, er þetta Samherjatrums allt til marks um ferlegt ástand. Sem snýr að prinsippum sem skipta verulegu máli.
Enginn sem að ætti að koma, blaðamenn, akademía eða stjórnvöld hefur lagt það niður fyrir sig að herða upp á skilgreiningum sem eru í lausu lofti eftir net. Þar kemur til getuleysi, hégómi og skitnir sérhagsmunir. Hvað sem okkur kann að þykja um það í sjálfu sér er það ekki lengur fjölmiðla að ákvarða hvað heyrir til opinberrar birtingar og hvað ekki. Hliðvarslan er að verulegu leyti farin.“
Jakob vill meina að fleiri og fleiri lýti á sig sem hæfan blaðamann og ritstjóra. Það verði endanlega til þess að „þekkingarleysi verði jafngilt fagmennsku“.
„Þegar við bætist að hver og einn Íslendingur telur sig pennafæran með afbrigðum og í raun alskapaðan blaðamann og ritstjóra eins og Aþena úr höfði Seifs kárnar staðan enn. Við bætist ástar/haturssamband þjóðarinnar við fjölmiðla sem er í hlutverki hins mikla blórabögguls og það að öll sérþekking er látlaust töluð niður. Lýðræðið er orðið svo slappt að þekkingarleysi er jafngilt fagmennsku. Þá er komin upp kjörstaða fyrir upplýsingaóreiðu.“
Þá ræðir Jakob sjálfan „þáttinn“ sem hann segi að brjóti grunnsiðareglur blaðamennsku. Samherjamenn bregði sér í hlutverk fréttamanna en fjalli svo bara um eigin mál og hagsmuni
„Í því ljósi tromma Samherjamenn fram með sinn „þátt“. Og vilja leggja fram sem jafngildan fréttaflutningi sem unninn er af fagfólki. Að þeir geti hæglega brugðið sér í líki fréttamanna en tekst ekki betur til en svo að þeir brjóta samstundis eðli máls samkvæmt eina helstu siðaregluna sem er sú að blaðamenn fjalla ekki sem slíkir um sjálfa sig eða hagsmuni sína. Hverskonar vitleysa er þetta? Skjöl sem sögð eru ekki til eiga jafnframt að vera fölsuð.“
Að lokum segir hann segir grátlegt að fólk lýti á „þátt“ Samherja sem „marktækt framlag“. Jakob vill meina að til þess að sporna við þessu þurfi að bera virðingu fyrir fagmennsku og að fólk þurfi að standa með fjölmiðlum.
„Það er svo beinlínis grátlegt að fylgjast með sprikli ýmissa sem vilja ræða þetta út frá þeim punkti að hér sé um marktækt framlag að ræða.
Eina leiðin til að sporna gegn upplýsingaóreiðu, falsfréttum er sú að við förum að bera virðingu fyrir fagmennsku, hættum að orga gegn eigin hagsmunum og förum að standa með okkar fjölmiðlum. Einhver sér sér sannarlega hag í að grafa undan þeim; hættum að vera nytsamir sakleysingjar í þeim hráskinnaleik.“
