Mikill eldur kom upp í íbúðarhúsi á horni Bræðraborgarstígs og Vesturgötu á fjórða tímanum í gær. Slökkvilið höfuðborgarsvæðisins bjargaði nokkrum út úr húsinu með aðstoð stiga og aðrir komust sjálfir út. Morgunblaðið segir að manntjón hafi orðið í eldsvoðanum en hafði ekki fengið það staðfest áður en blað dagsins fór í prentun.

Baráttan við eldinn var erfið og tímafrek. Slökkvistarfi lauk í gærkvöldi. Vettvangsrannsókn lögreglu hefst væntanlega í dag.

Sex voru fluttir á slysadeild og liggja einhverjir þeirra á gjörgæsludeild. Talið er að 6 til 10 manns hafi verið í húsinu þegar eldurinn kom upp.

Þrír voru handteknir á vettvangi í gær og er lögreglan að skoða tengsl þeirra við málið hefur Morgunblaðið eftir Ásgeiri Þór Ásgeirssyni, yfirlögregluþjóni.

Eins og DV skýrði frá í gær var karlmaður handtekinn í rússneska sendiráðinu í gær, skömmu eftir að tilkynnt var um eldinn, en ekki hefur fengið staðfest að hann tengist eldsvoðanum.