„Við höfum fundið fyrir auknum áhuga fólks á menntun og á því að taka þátt í þróun skóla- og frístundastarfs. Undanfarið hefur áhugi á uppeldi og velferð barna og ungmenna aukist og sérstaklega í COVID-faraldrinum,“ segir Kolbrún Þ. Pálsdóttir, forseti menntavísindasviðs Háskóla Íslands.
Aðsókn í meistaranám við Háskóla Íslands fjölgar í ár samkvæmt tilkynningu frá Menntavísindasviði Háskóla Íslands. Um er að ræða 118% fjölgun í leikskólafræðum. Umsóknir voru 57 árið 2019 en í ár eru þær 124. Aðsókn í grunnskólakennaranám eykst um 85% og í framhaldsskólakennaranám um 47%. Umsóknum um íþróttakennaranám á meistarastigi fjölgar um 67%. Umsóknum í framhaldsnám í tómstunda- og félagsmálafræði fjölgar um 30%. Einnig er fjölgun á umsóknum í framhaldsnám í uppeldis- og menntunarfræði. Þetta kemur fram í tilkynningu á Facebooksíðu menntavísindasviðs.
„Í heimsfaraldri steig starfsfólk og stjórnendur í frístunda- og skólastarfi og kennarar allra skólastiga fram sem samhent teymi, lausnamiðað og skapandi, með fangið fullt af umhyggju fyrir börnum og ungmennum þessa lands. Ég skil vel að fólk vilji tilheyra þessu magnaða teymi og taka þátt í því að móta framtíðina, eitt skref í einu. Við hlökkum til að taka á móti nemendum í haust,“ segir Kolbrún.
