Sveinn Geir Arnarsson, skipstjóri togarans Júlíusar Geirmundssonar, hefur verið ákærður fyrir brot á sjómannalögum. RÚV greinir frá. Hópsýking af COVID-19 varð um borð í togaranum en skipstjórinn hefur verið sakaður um að halda túrnum áfram þrátt fyrir vitneskju um smit.
Samkvæmt RÚV er skipstjórinn ákærður fyrir brot á 34. grein sjómannalaga. Þar segir að veikist skipverji eða slasist skuli skipstjóri sjá um að hann fái nauðsynlega umönnun á skipinu eða í landi. Jafnframt að ef ástæða sé til að ætla að skipverji sé haldinn sjúkdómi sem hætta stafar af fyrir aðra menn á skipinu skuli skipstjóri láta flytja sjúklinginn í land ef ekki reynist unnt að verjast smithættu á skipinu.
Það er Lögreglan á Vestfjörðum sem gefur út ákæruna.
Af 25 skipverjum Júlíusar Geirmundssonar smituðust 22 af veirunni. Einkenna varð vart um borð á fyrstu dögum túrsins.
Málið verður þingfest fyrir Héraðsdómi Vestfjarða í janúar.
