Samkvæmt frétt RÚV óskaði Lögreglan á Vesturlandi eftir aðstoð Sérsveitar Ríkislögreglustjóra síðdegis í dag.

Ökumaður var stöðvaður undir áhrifum fíkniefna í Borgarfirði. Í kjölfarið fór fram húsleit í sumarhúsi og fannst það sprengiefni. Var því kallað eftir aðstoð sprengjudeildar sérsveitar ríkislögreglustjóra sem fjarlægði sprengiefnið og er aðgerðum lokið.

Aðgerðir áttu sér stað nálægt Borgarnesi.

Lögreglan á Vesturlandi hefur birt eftirfarandi fréttatilkynningu um málið:

Lögreglan á Vesturlandi stöðvaði í dag för ökumanns í Borgarfirði sem grunaður er um akstur undir áhrifum ávana- og fíkniefna. Ökumaður og farþegi hans eru einnig grunaðir um vörslu og meðferð ávana- og fíkniefna. Fólkið var handtekið og flutt á lögreglustöð. Við leit á þeim og í bílnum fundust ætluð fíkniefni. Í framhaldi af handtökunni var farið í húsleit í sumarhúsi sem þessir aðilar komu frá og þar fundust ætluð fíkniefni. Í sumarhúsinu fannst einnig poki með töluverðu magni af hvellhettum og rörasprengju. Sprengjusérfræðingar sérsveitar ríkislögreglustjóra voru því fengnir á vettvang til aðstoðar lögreglumönnum. Þeir komu á staðinn með sprengjuleitarhund og leituðu og tryggðu vettvang. Það þarf ekki að fjölyrða um hættuna sem getur stafað af hvellhettum og rörasprengjum. Hér á landi hafa orðið alvarleg slys vegna þessa. Í hvellhettum er alla jafna hásprengiefni og í rörasprengjum er oft púður sem hvort tveggja veldur miklum skaða ef springur í höndunum á fólki.