Elín Agnes Kristínardóttir, aðstoðaryfirlögregluþjónn hjá Lögreglunni á höfuðborgarsvæðinu, segir í viðtali við Fréttablaðið að lögregluna gruni íkveikju í eldsvoða í fjölbýlishúsi í Urðarbrunni í Úlfarsárdal í gærkvöld.

Eldur kviknaði í einni íbúð og gekk greiðlega að slökkva hann. Skemmdir á íbúðinni eru hins vegar miklar. Maður sem hefur búið þar er virkur keppandi í MMA bardagaíþróttinni. Hann  birti slagsmálamynd af sér á samfélagsmiðlum um helgina, myndbandið vakti mikla athygli og leiddi til þess að maðurinn var handtekinn á sunnudag. DV hefur árangurslaust reynt að ná tali af manninum í dag.

Íbúðin var mannlaus er eldurinn kviknaði. Sjónarvottur segir hlut hafa verið fleygt inn um glugga að íbúðinni. Grunur leikur á að um bensínsprengju hafi verið að ræða. Það getur lögregla ekki staðfest í samtali við Fréttablaðið enda þurfi aðkomu rannsóknarstofu í Háskóla Íslands til að skera úr um það, og slíkt taki tíma.