Sjálandsskóli hefur sent frá sér yfirlýsingu vegna afar grófs eineltismáls í skólanum sem DV fjallaði um í morgun.

Sjá einnig: Grimmilegt eineltismál í Sjálandsskóla

Í yfirlýsingunni er staða málsins hörmuð og áréttað að einelti sér ávallt tekið alvarlega og lögð áhersla á að leysa slík mál. Greint er frá því að unnið sé markvisst gegn einelti í skólanum og námskeið sótt hjá vináttufærnifélaginu KVAN:

„Við hörmum þá stöðu sem upp er komin vegna eineltismáls sem fjallað hefur verið um á opinberum vettvangi.

Unnið hefur verið eftir eineltisáætlun Garðabæjar síðan tilkynning til skólans barst um þetta tiltekna mál.

Einelti er alltaf tekið alvarlega og lögð er rík áhersla á að leysa slík mál.

Skólinn getur ekki tjáð sig um mál einstaka nemenda en mikilvægt er að það komi fram að unnið hefur verið með nemendum skólans í félagsfærni og vináttuþjálfun um langt skeið. Meðal annars hafa allir kennarar skólans sótt námskeið hjá KVAN þar sem kennarar geta sótt í verkfærakistu til að efla og þjálfa félagsleg samskipti. Þeirri vinnu verður haldið áfram í skólanum í samvinnu við fræðslusvið Garðabæjar.

Skólinn hefur lagt sig fram um að vinna öll eineltismál og samskiptamál sem upp koma faglega og af festu.

Við biðlum til allra að huga að því að hér er um að ræða börn og mikilvægt að sýna aðgát í orðræðu.“