„Ungmennasamtökin sem hafa skipulagt verkföll fyrir loftslagið á Austurvelli undanfarið hálft ár skora nú á foreldra, ömmur og afa, frændur og frænkur að fylkja liði með börnum sínum og mæta með þeim á Austurvöll föstudaginn 20. september.“
Þetta kemur fram í tilkynningu frá skipuleggjendum aðgerðanna.
Í tilkynningunni segir að þann 20. september muni milljónir barna og ungmenna um allan heim efna til allsherjarverkfalls fyrir loftslagið. Alls staðar sé ákallið hið sama: Við þurfum að taka höndum saman, allar kynslóðir, í baráttunni gegn loftslagshamförum sem ógna náttúru og lífríki jarðar.
„Viðburðurinn markar upphaf allsherjarverkfallsviku sem stendur til 27. september. Klukkan 17:00 þann 20. september verður stór ganga allra kynslóða frá Hallgrímskirkju á Austurvöll. Þar mun fólk á öllum aldri ávarpa fundinn í bland við tónlistarflutning og önnur atriði. Fundurinn mun leggja fram áskorun til stjórnvalda og undirskriftarsöfnun vegna hennar verður sett í loftið.“
Skipuleggjendur eru Landssamtök íslenskra stúdenta, Stúdentaráð Háskóla Íslands, Ungir umhverfissinnar, Samband íslenskra framhaldsskólanema, Vakandi og Landvernd.
Dagskrá 20. september:
12:00 Hefðbundið verkfall ungmenna á Austurvelli, öll velkomin
13.00 til 16:00 Bolaprentun og skiltagerð í Tjarnarsal Ráðhúss Reykjavíkur
17.00 Ganga frá Hallgrímskirkju að Austurvelli
17.30 Ávörp, áskorun og tónlist til 19.30
21. til 27. september:
12:00 Verkfall í hádeginu á hverjum degi
Ýmsir hliðarviðburðir, nánari upplýsingar facebook.com/loftslagsverkfall
