„Hver sem hefur samræði eða önnur kynferðismök við mann án samþykkis hans gerist sekur um nauðgun og skal sæta fangelsi ekki skemur en 1 ár og allt að 16 árum,“ segir í hegningarlögum. Stundin greindi frá því á mánudag að maður hefði játað hjá lögreglu að hafa haft endaþarmsmök við 17 ára kærustu sína á meðan hún var sofandi, og játaði hann þar að auki að vita vel að hún væri mótfallin slíkum samförum.

Þessi atvikalýsing hljómar eins og klippt og skorin sakfelling fyrir nauðgun, en svo reyndist ekki vera. Hvorki lögregla né ríkissaksóknari töldu tilefni til að taka málið til rannsóknar þar sem maðurinn hefði ekki verið að játa ásetningsbrot því hann sagðist hafa verið sofandi þegar hann framdi ódæðið.

Játningin kom fram þegar maðurinn var yfirheyrður vegna gruns um að hafa brotið kynferðislega gegn dætrum sínum. Leyfið mér að endurtaka: Dætrum sínum! Hann játar kynferðisbrot við yfirheyrslu vegna gruns um ANNAÐ kynferðisbrot en lögregla sér enga ástæðu, alls enga, til að hefja rannsókn.

Það er engum vafa undiropið að það er ólöglegt að hafa samfarir við sofandi manneskju. En er það löglegt ef gerandinn segist líka hafa verið sofandi? Þessi niðurstaða er kjaftshögg fyrir brotaþola nær og fjær og skilaboðin til samfélagsins eru ógnvekjandi:

„Viltu komast upp með kynferðisbrot? Ekki örvænta! Segðu bara að þú hafir verið sofandi.“