Á femínísku Facebook-síðunni KÞBAVD, eða Konur þurfa bara að vera duglegri, hefur dómi í meiðyrðamáli gegn Oddnýju Arnarsdóttur og Hildur Lilliendahl Viggósdóttur verið breytt. Nýtt orðalag gefur í skyn að þær hafi ekkert gert rangt. Ekki er útilokað að síðan sé tengd Hildi en árið 2017 ræddi hún við Stundina um vefsíðu með sama nafni.

Hvað sem því líður þá hefur orðum í dómnum verið breytt og í stað til dæmis orðins „réttarríkishugsjónin“ stendur nú „feðraveldið“ og í stað „borgara“ stendur nú „konur og jaðarhópar“. Myndir af þessu má sjá hér fyrir neðan.

Lýsing KÞBAVD sem fylgir með myndunum er í fremur kaldhæðnum tón: „Dómurinn yfir Hildi og Oddnýju, glæpakvendunum sem ögruðu þeirri grundvallarsýn samfélagsins að æra karla sé heilagri en friðhelgi kvenna, er í yfirlestri sem stendur. Það þurfti að skerpa aðeins á ákveðnum atriðum eins og sjá má á meðfylgjandi myndum.“

Hildur og Oddný voru dæmdar í Héraðsdómi Reykjavíkur til greiðslu miskabóta vegna ummæla sem þær létu falla á samfélagsmiðlum um tvo menn tengda meintu nauðgunarmáli í Hlíðahverfi haustið 2015. Oddný var dæmd til að greiða hvorum manni 220.000 krónur og Hildur 150.000 krónur.

Mennirnir voru hins vegar ekki úrskurðaðir í gæsluvarðhald og af þeirri ástæðu reis upp mikil mótmælaalda. Oddný og Hildur skipulögðu þá mótmæli fyrir utan lögreglustöðina á Hlemmi. Rannsókn á hinum meintu brotum leiddi ekki til ákæru og felldi ríkissaksóknari það niður í júní 2016.