„Utanvegaakstur er ein mesta ógnin í Friðlandi að Fjallabaki,“ segir í frétt á vef Umhverfisstofnunar. Þegar fjallvegir voru opnaðir í vor komu í ljós ljót sár eftir utanvegaakstur eins og sjá má á mynd sem fylgir fréttinni. Um neikvæð áhrif utanvegaaksturs segir í fréttinni:
Ásýnd svæðisins versnar til muna, hjólförin skilja eftir rákir eða sár í gróðursverðinum sem getur tekið tugi ára að jafna sig. Það skapast kjöraðstæður fyrir vatnsrof sem veldur jarðvegsrofi og síðast en ekki síst hafa þessi ummerki neikvæð áhrif á upplifun ferðamanna í óbyggðum.
Umhverfisstofnun segist hafa gripið til ýmissa aðgerða til að sporna við utanvegaakstri. Meðal annars hafi landvarsla verið aukin á hálendinu, en það dugar ekki til:
„Landverðir starfa einungis yfir sumartímann í 3-4 mánuði á ári en ferðamenn fara um hálendið allt árið um kring. Drjúgur tími landvarða yfir sumartímann fer í eftirlit og lagfæringar á sárum eftir utanvegaakstur en fæstir þeirra sem valda skemmdunum eru gripnir á vettvangi.“
Þá segir enn fremur að mikilvægt sé að efla enn frekar fræðslu um neikvæð áhrif utanvegaaksturs og fræða ferðamenn um þessi efni áður en þeirra leggja upp í ferðalög um náttúru Íslands.
