„Sælir félagar. Þannig er mál með vexti að vinir okkar í Grænlandi, Henrik Leth, var að biðja mig að setja niður fyrir sig hvað þyrfti til í fjárfestingum, veiðum, vinnslu og hafnarmannvirkjum ef menn myndu vera setja upp fiskimjöls og uppsjávarverksmiðju í Ammasalik austurströnd Grænlands. Hann er ekki að hugsa um að setja neitt upp, heldur eru einhverjir heimamenn í Grænlandi með einhverja með sér í því að reyna ná kvótum og goodwill af stjórnvöldum með því að þykjast vera fara byggja upp á Austur Grænlandi“

Svon hljóðar tölvupóstur sem Gunnþór Ingvason, framkvæmdstjóri Síldarvinnslunnar í Neskaupstað, sendi stjórnendum hjá Samherja, þeim Aðalsteini Helgasyni, Jóhannesi Stefánssyni og manni sem var með netfangið siggi@samherji.is. Fréttablaðið skýrir frá þessu í dag.

„Eigið þið ekki tilbúna einhverja svona punkta þó svo að þeir eigi við um Afríku?“

Spyr Gunnþór Samherjamennina sem taka vel í beiðni hans.

„Það er kannski spurning um að taka frá Marokkó, hvað segirðu um það?“

Spurði Jóhannes í svari til Gunnþórs og beindi spurningunni til fyrrnefnds Sigga.

„Gunnþór, ertu að leitast eftir einvherju ýtarlegu eða bara í kynningarformi?“

Spurði Jóhannes Gunnþór síðan.

„Nei, bara punktum hvað þarf.“

Svaraði Gunnþór.

Fréttablaðið segir að tölvupósturinn, sem ber yfirskriftina „Að nema nýjar lendur“, hafi verið sendur þann 30. apríl 2014 og sé hluti þeirra skjala sem Wikileaks hefur birt. Hann er birtur orðrétt.

Blaðið segir að Aðalsteinn Helgason hafi verið einn af lykilstarfsmönnum Samherja í á þriðja áratug en hafi látið af störfum 2016 en það ár lét Jóhannes Stefánsson, sem ljóstraði upp um meinta mútustarfsemi Samherja í Namibíu, einnig af störfum. Henrik Leth, sem er nefndur í tölvupóstinum, er stjórnarformaður Polar Seafood sem er stærsta grænlenska fyrirtækið í einkaeigu.

Gunnþór vildi ekki tjá sig um málið við Fréttablaðið þegar leitað var eftir því.