Þau fleygu orð voru látin falla á samfélagsmiðlum, eftir að DV sagði frá umdeildum brandara um Hildi Lilliendahl sem varð til þess að brandarasíðu á Facebook var lokað, að DV legði Hildi í einelti. Sandkornaskrifari ákvað að gamni að fletta upp hve mikið hefur verið skrifað um Hildi það sem af er ári. Niðurstaðan: 29 greinar, um það bil ein grein á tíu daga fresti. Af þessum 29 greinum eru fjórar greinar um Málfrelsissjóð sem var til að mynda stofnaður til að létta undir kostnað Hildar vegna ærumeiðingardóms sem hún hlaut í Hlíðarmálinu svokallaða. Þrjár greinar eru um Hlíðarmálið. Þrjár greinar innihalda jákvæð orð Hildar um ráðhúskisann sáluga, Guðna forseta og Margréti Pálu. Þrjár um Jón Baldvin Hannibalsson. Auk þess tvær aðrar greinar sem vakið hafa athygli á femínískum málstað Hildar. Alls fimmtán greinar. Hinar fjórtán fjalla til að mynda um nýlegan pistil Áslaugar Örnu, gagnrýni Hildar á viðtal við vændiskonu, úttekt á mötuneytismat ráðhússins, eitt sandkorn, skrif upp úr pistli Kolbrúnar Bergþórsdóttur á Fréttablaðinu. Svo má ekki gleyma að tvær af þessum fjórtán fjalla um fyrrnefndan brandara. Þetta er nú allt eineltið.