Fimmtíu mál voru bókuð hjá lögreglunni á höfuðborgarsvæðinu frá fimm síðdegis í gær til fimm í nótt.

Starfsfólk í matvöruverslun í hverfi 108 óskaði eftir aðstoð lögreglu laust fyrir klukkan hálf sjö í gærkvöldi vegna hóps fólks, líklega mótmælenda, sem voru með læti og gáfu frá sér ýmis dýrahljóð. Ekki kom til afskipta lögreglu þar sem fólkið yfirgaf verslunina fljótlega. Stuttu síðar veittu lögreglumenn bifreið athygli sem ekið var gegn rauðu ljósi í hverfi 105. Í ljós kom að ökumaður var undir áhrifum áfengis og var hann látinn laus að lokinni sýnatöku. Lögreglan stöðvaði annan ökumann undir áhrifum áfengis og fíkniefna í herfi 104 rétt fyrir klukkan hálf átta og nokkrar kvartanir bárust vegna ölvaðs fólks í miðbænum.

Í Breiðholti var kvartað yfir áreiti og ógnun frá betlara um kvöldmatarleytið. Hann brást illa við ef hann var hunsaður og var loks vísað í burtu af lögreglu. Þá var tilkynnt um hugsanlegan hatursglæp í efra Breiðholti. Veist var utandyra að þremur múslimskum konum og er málið í rannsókn.

Tilkynnt var um rúðubrot í Árbæjarskóla rétt fyrir sjö í gærkvöldi og rétt fyrir átta var tilkynnt um ofurölvi og ósjálfbjarga mann utandyra í íbúðarhverfi í hverfi 112. Maðurinn var vistaður í fangageymslu þar til ástand lagast. Þá var tilkynnt um eld í ruslagámi við Rimaskóla rétt fyrir klukkan ellefu í gærkvöldi. Slökkviliðið slökkti eldinn skömmu síðar.