Þorsteinn Halldórsson, sem er grunaður um hrottalegt kynferðisofbeldi gegn unglingspilti, hefur verið úrskurðaður í áframhaldandi gæsluvarðhald á grundvelli almannahagsmuna. Mbl.is greinir frá þessu. Aðalmeðferð í málinu hófst þann 5. febrúar og má því ætla að Þorsteinn muni sæta gæsluvarðhalds þar til dómur fellur.
DV fjallaði á dögunum ítarlega um mál Þorsteins en hann er sakaður um að hafa borið fíkniefni í átján ára pilt með þeim afleiðingum að hann var nánast meðvitundarlaus í viku. Þorsteinn er sakaður um að hafa brotið ítrekað á piltinum í um tvö ár og hófst meint brot þegar drengurinn var fimmtán ára.
Sjá einnig: Þorsteinn grunaður um hrottalegt kynferðisofbeldi
Þorsteinn hefur verið formaður Baldurs, eins af félögum Sjálfstæðismanna í Kópavogi, um árabil en Vísir greindi frá því á dögunum að flokkurinn hafi fjarlægt nafn hans af heimasíðu sinni. Þá starfaði Þorsteinn á Sjónvarpsstöðinni Hringbraut þar sem hann stýrði þáttum um klassíska tónlist.
Líkt og fyrr segir hófust meint brot Þorsteins gegn piltinum þegar sá var fimmtán ára. Þorsteinn er sakaður um að hafa gefið piltinum peninga, tóbak og farsíma og nýtt sér yfirburði sína gagnvart honum til að hafa við sig samræði og önnur kynferðismök. Þá á Þorsteinn að hafa tekið klámmyndir af piltinum og geymt í læstri möppu í farsíma sínum.
