Merki Miðflokks Sigmundar Davíðs Gunnlaugssonar hefur vakið mikla athygli frá því það var kynnt í gær. Merkið sýnir hnarreistan hest fyrir framan norðurljós og segir Sigmundur sjálfur að það tákni íslenska hestinn sem hefur fylgt Íslandi frá upphafi.

„Íslenski hesturinn hefur fylgt Íslendingum frá upphafi. Hann er þjóðlegur og um leið eitt af táknum landsins út á við og hefur myndað sterk tengsl milli Íslendinga og fólks víða um heim. Hann sameinar sveit og þéttbýli, vinnu og afþreyingu. Íslenski hesturinn þykir skynsamur og þrautseigur. Hann getur staðið af sér storm og harðan vetur. Hann hefur mikla aðlögunarhæfni og þekkir leiðina heim. Kemur mönnum alltaf á leiðarenda þótt leiðin geti verið torsótt og löng,“ segir Sigmundur um hestinn.

Nokkrir hafa þó bent á að hesturinn sé mögulega útlenskur þar sem útlína hestsins virðist vera byggð á erlendri mynd. Einna þeirra er Halldór Högurður en á Facebook-síðu sinni ber hann saman svokallaðan „clip-art“ hest af vefnum openclipart.org. „Miðflokksmerin sem sögð er hinn íslenski hestur reynist svo bara óuppgefið aflandshross mannsins sem hrókerar alltaf sannleikanum. Fagri blakkur er ókeypis mynd af openclipart.org,“ segir Halldór.

Myndin passar ekki alveg og bendir Völundur nokkur Jónsson á það í athugasemd hjá Halldóri. „Ágætt, en þetta passar ekki – teikningarnar eru ekki eins. Þær eru líkar, en þetta er alls ekki sama teikningin,“ segir Völundur og því svarar Halldór: „Júbb, sveigurinn er sá sami, það var átt við fax og fætur“ og bætir við: „Arabískur hestur verður ekki íslenskur við smá fegrunar-/ljótkunaraðgerð“