Einstæð móðir segir farir sínar ekki sléttar í samskiptum sínum við flutningafyrirtækið DHL eftir að hafa verið rekin vegna þess að hún tók sér þriggja daga frí eftir að hafa hætt með kærastanum. Hin 24 ára Katy Payne átti að mæta til vinnu hjá DHL í bænum Ruddington á Englandi í síðustu viku en hún hafi þurft að taka sér nokkra daga frí eftir að hún hætti með kærastanum sínum, hinum 37 ára gamla Chris Rainbow.

„Á mánudeginum sagði ég yfirmanni mínum að ég þyrfti að taka mér smá frí til að taka til íbúðinni og svona og það virtist allt vera í góðu. Svo þegar ég mætti aftur á fimmtudeginum þá var mér sagt að fara,“ sagði Katy í samtali við breska dagblaðið Nottingham Post, hún hafi unnið þar í 18 mánuði og aldri tekið sér frí fyrr nema í eitt skipti þegar 3 ára sonur hennar varð veikur.

„Áfallið var mikið því ég hef verið að reyna að leggja grunn að góðu lífi fyrir mig og barnið mitt. Ég átti alls ekki von á þessu,“ segir hún og bætir við að nú hafi hún þurft að flytja inn til móður sinnar. Katy þvertekur fyrir að fríið hafi ekki verið nauðsynlegt: „Kærastinn minn fyrrverandi var búinn að vera að bögga mig yfir allskonar málum, ég þurfti að semja við leigusalann og selja húsgögn, það var ekki þannig að ég væri bara heima að gera ekki neitt.“

Talsmaður DHL á Englandi sagði fyrirtækið ekki geta tjáð sig um málefni einstakra starfsmanna. Katy leitar nú réttar síns hjá verkalýðsfélagi sínu.