Blaðamaður New Yorker birtir hér frábær ráð um hvernig má halda sönsum á meðan maður er í sóttkví.

Fáðu nægan svefn

Sofðu – hvar sem er! Í eða undir rúminu, á sólríkum stað, undir sænginni, við gluggann, öfug/ur, á sófanum, á miðju gólfi, ofan á ísskápnum, í skápnum, á bakinu, í fósturstellingu, í kassa.

Vertu virk/ur

Hrintu bunka af myntum af borðinu til þess að sjá hversu langt þær skoppa og rúlla. Eltu eigin rófu. Breiddu úr þér ofan á góðri bók. Láttu eitthvað bregða þér – bara hvað sem er – og skjóstu út úr herberginu.

Þrífðu þig reglulega

Þrífðu þig bak við eyrun. Og gerðu það svo aftur.

Eigðu samskipti við vini og fjölskyldu

Byrjaðu að æpa á hvern sem getur heyrt í þér klukkan 6 að morgni til, út af engu. Gólaðu á fuglana. Gakktu yfir (eða leggstu ofaná) lyklaborð. Grenjaðu fyrir framan lokaða hurð sem liggur að herbergi sem þú átt hvort sem er ekkert að vera inni í. Bíttu í síma. Orgaðu ofan í matardallinn þinn sem er fullur af mat.

Hafðu jafnvægi í mataræðið

Borðaðu litlar máltíðir, þrisvar til fjórtán sinnum á dag. Hrintu mat á gólfið svona fyrir fjölbreytnina. Settu alla höndina þína ofan í skál fulla af poppi og ákveddu síðan að þig langi ekki í popp. Steldu kalkúnasneið úr samloku sem liggur á glámbekk.

Drekktu nóg vatn

Drekktu nóg af vatni, helst beint úr krananum.

Finndu þér nýtt áhugamál

Feldu öll leikföngin þín undir sófanum. Rífðu niður allan þann pappír sem þú kemst í. Rífðu í sundur sófa herbergisfélaga þíns. Klíndu hárinu þínu á hvern einasta snefil af fatnaði sem þú finnur. Skíttu í box og feldu svo verksummerkin vandlega.

Hugleiddu

Starðu á punkt á veggnum eða í loftinu í sex mínútur.

Hlýddu Víði

Haltu þig frá mannverum. Hvæstu ef þú þarft þess.

Greinin er þýdd úr ensku af vefmiðlinum New Yorker.