Fyrir þremur vikum síðan lenti kona að nafni Tiffany Mitchell í mótorhjólaslysi þegar hún var að hjóla með vinum sínum í Nashville í Bandaríkjunum.

Tiffany er áhrifavaldur á Instagram og er með 214 þúsund fylgjendur á miðlinum.

Tiffany deildi færslu á Instagram, sem nú hefur verið eytt, um slysið og deildi einnig myndum af sjálfri sér á slysavettvangi. Hún hefur verið harðlega gagnrýnd í kjölfarið og sökuð um dulda auglýsingu. Fjölmiðlar á borð við The Independent, Mirror, The Sun, Buzzfeed og Daily Mail hafa fjallað um málið.

Fjöldi fólks óskaði henni góðs bata meðan aðrir sögðu hana sveipa töfraljóma yfir slysið til að fá fólk til að líka við myndina.

„Huh. Þú lentir í alvarlegu bílslysi en fólk var þarna til að taka *sláandi* myndir? Þetta er móðgun fyrir fólk sem lendir í slysum. Hættu að sveipa töfraljóma yfir slys,“ skrifaði einn netverji.

„Hver TEKUR EKKI myndir í miðju mótorhjólaslysi? #smartwater #life. Hvernig er fólk að skrifa við þessa mynd eins og þetta sé eðlilegt? Mér líður eins og Elaine Benes er að öskra á alla fyrir að borða Snickers með gaffli. HVAÐ ER AÐ YKKUR ÖLLUM? HAFIÐ ÞIÐ MISST VITIÐ?“ Skrifaði annar.

Tiffany hefur svarað gagnrýninni og ver ákvörðun sína að deila myndunum. Hún minnir fylgjendur sínar á að hún hefur alltaf deilt „raunverulegum lífsögum“ með þeim og er ekki hrædd við að ræða alvarleg og erfið málefni.

https://www.instagram.com/p/B1Z1M3ygEH4/

„Ég hef verið sökuð um að sviðsetja slysið til að fá athygli, eða nota það til að auglýsa vörur með vatnsfyrirtæki, og einnig sökuð um aðra hluti sem ég skil ekki,“ skrifar Tiffany og vísar í vatnsflöskuna frá Smart Water sem sést mjög vel á einni myndinni.

Tiffany segir að vinur hennar sem er atvinnuljósmyndari hafi verið á svæðinu og tekið myndirnar án þess að hún vissi af því. „Þegar ég komst að því að hann hafi tekið myndirnar þá hreyfði það við mér,“ segir hún.