„Ég var einmitt mjög grannur unglingur,“ segir framleiðandinn og klipparinn Ragnar Eyþórsson í innslagi í Íslandi í dag. „Svo hefur maður minni þörf fyrir að vera grannur þegar maður er kominn í samband […] Svo vernar þetta þegar maður hefur minni tíma.“

Ragnar, eða Raggi eins og hann er oftast kallaður, hefur unnið í sjónvarpsbransanum í fjölmörg ár, en segir að hann hafi byrjað að þyngjast mikið þegar hann fór í háskóla í Norður-Ameríku.

„Ef maður var ekki að læra á fullu var djamm og sukkað í Mac og cheese og hamborgurum. Tíminn hljóp frá manni að sinna líkamanum,“ segir hann. Hann var um áttatíu kíló í menntaskóla og var orðinn hundrað kíló þegar hann fór í háskóla.

„Ég kom heim um 120 kíló þremur árum síðar. Þá var ég 26 ára.“

„Ég hef ekki verið í tveggja stafa tölu síðan á síðustu öld“

Núna er Raggi 145 kíló en segir það ekki hafa mikil áhrif á sjálfsmynd sína.

„Ímynd mín með sjálfan mig er alltaf mjög fín,“ segir hann, en bætir við að honum finnist leiðinlegt að daglegar athafnir, eins og að ganga upp stiga, séu erfiðar. Því hefur hann ákveðið að taka heilsuna föstum tökum og er með skýr markmið.

„Ég ætla að reyna að hrynja niður í þyngd. Ég ætla að byrja á að koma mér niður í svæðisnúmer og trappa mig svo niður í útvarpsstöðvarnar,“ segir Raggi á gamansömum nótum eins og hans er von og vísa. „Ég hef ekki verið í tveggja stafa tölu síðan á síðustu öld.“

Raggi er byrjaður að hreyfa sig á ketilbjöllunámskeiði hjá útvarpsmanninum Kristóferi Helgasyni í World Class og ætlar líka að taka mataræðið í gegn.

„Eftir alla þessa kúra held ég að það sé gáfulegast að taka kúrinn Hættu að éta eins og fífl.“