Undanfarið hefur slímgerði verið vinsæl meðal barna á Íslandi og hafa hráefni fyrir gjarnan orðið uppseld í mörgum búðum. Þau efni sem börn hafa verið að nota í slímgerð eru meðal annars raksápa, lím linsuvökvi og efni sem heitir Borax.

Borax er uppleysanlegt þvottaefni og vert er að taka fram að hægt er að búa til slím án þess, þá sé linsuvökvi notaður í staðinn.

Á dögunum var tíu ára gömul íslensk stúlka að búa til slím heima hjá vinkonu sinni sem endaði því miður illa.

„Hún var að búa til slím hjá vinkonu og kvartaði um kláða í augum og puttum. Ég sá ekki neitt og tengdi þetta ekki við slímið,“ segir móðir hennar í samtali við Bleikt. Mæðgurnar vilja ekki koma fram undir nafni en vilja koma skilaboðunum áleiðis í þeirri von um að vara aðra við.

„Svo í gær var hún að leika með það yfir daginn, kvartaði svo um í augum í gærkvöldi og ég lét hana setja kaldan þvottapoka og fara í bað. Svo vaknaði hún í morgun stokk bólgin og gat varla opnað augað. Við fengum neyðartíma hjá lækni strax í morgun og fengum sýklakrem og mildison. Hún er strax orðin skárri en ég mæli ekki með því að börn séu að búa til slím og nota Borax. Hún hefur notað þetta efni í marga mánuði en greinilega allt í einu fengið óþol.“

Myndirnar sýna hversu slæmt óþol stúlkan fékk og eru þær birtar með hennar leyfi.