Ef köngulær hreiðra um sig á heimilum þá er það vísbending um að manngerð eiturefni, eins og skordýraeitur, blý, PCB og DDT er ekki að finna á heimilunum, að sögn Lars Gunnarsen, prófessors hjá dönsku byggingarannsóknarstofnuninni.
Lítil skordýr éta ryk og því éta þau einnig þau eiturefna sem er að finna á heimilum. Eiturefnin safnast saman í líkama skordýranna, því þau geta ekki losað sig við þau, og því verður magn þeirra mjög mikið, svo mikið að köngulær sem éta þau deyja af völdum þess að sögn Gunnarsen.
„Lifandi könguló er því til merkis um að það er ekki of mikið af syndum fortíðarinnar – gömlum eiturefnum – í íbúðinni þinni.“
Köngulær eru nytjadýr að sögn Karl-Martin Vagn Jensen, hjá Árósaháskóla, en í samtali við Metroxpress sagði hann að þar sem þær éti maura, silfurskottur og flugur þá geri þær gagn með því að fjarlægja þessi dýr sem eru okkur yfirleitt til ama.
Þá eru köngulær á heimilum fólks einnig ákveðinn gæðastimpill á gæði lofts á heimilunum. Þær þrífast ekki þar sem er of þurrt og því eru lifandi köngulær til merkis um að loftið sé hæfilega rakt. Við mennirnir getum einfaldlega fengið okkur vatnsglas ef það er of þurrt heima hjá okkur en það geta köngulærnar ekki og því þrífast þær ekki þar sem er of þurrt.
