Lilja Þorvarðardóttir förðunarfræðingur tekur nú þátt í keppninni Nordic face awards í annað skiptið. Á síðasta ári komst Lilja í topp 30 en í ár stefnir hún á sigur.
„Þetta er þriðja árið sem Nordic face awards er haldið en Face awards er ein stærsta förðunarkeppnin í Bandaríkjunum. Hún er haldin í 43 löndum út um allan heim en Nordic face awards er sem sagt keppnin sem er bara haldin innan Norðurlandanna,“ segir Lilja í samtali við blaðamann.
Lilja er 24 ára gömul og útskrifaðist hún árið 2016 úr Mask makeup academy.
„Ég tók líka þátt í fyrra og komst í topp 30. Einhvern veginn þá fékk ég bara spark í rassinn og langaði að gera þetta 100% í ár og vinna keppnina.“
Keppnin er haldin í skrefum og í hverju skrefi er ný áskorun.
„Keppendur gera myndband af ákveðnu þema og dómnefnd velur hverjir komast áfram alveg þangað til í topp 15. Eftir það fara völdin til áhorfendanna og kjósa þeir hverjir komast í topp 5, þá taka dómararnir aftur við og velja sigurvegara. Hvert einasta atkvæði skiptir miklu máli og þetta er mikið ævintýri. Mig langar að Íslendingur taki þetta heim í ár.“
Nýjasta myndband Lilju má sjá hér fyrir neðan og hægt er að kjósa hana einu sinni á dag til 22. maí inn á Nordicfaceawards.com