Mig langar til að pistill vikunar fjalli um verkefni sem ég tek þátt í þessa dagana ásamt 15 öðrum mömmum. Við köllum okkur Hjartamömmur.
Þegar barnið manns greinist hjartveikt er mjög mikilvægt að eiga félag að eins og Neistann. Neistinn er styrktarfélag hjartveikra barna sem styður fjölskyldur barna og unglinga á hinn ýmsa hátt. Eitt af því sem félagið gerir er að halda úti síðu þar sem foreldrar geta fengið upplýsingar og fræðslu.
Heimasíða Neistans er komin á tíma með uppfærslu og endurbætur og langaði okkur hjartamömmur að aðstoða og gefa til baka það sem Neistinn hefur gefið okkur. Þarna var komið kjörið tækifæri til þess og varð þannig þessi hlaupaáskorun til. Í febrúar byrjuðum við svo að hlaupa og stendur áskorunin yfir í 6 vikur. Við skiptum okkur í 4 lið og hlaupum svo um allt þessar 6 vikur og söfnum kílómetrum. Sum fyrirtæki kaupa af okkur kílómetra, önnur styrkja með ákveðinni upphæð og en fleiri styrkja okkur með gjöfum sem koma sér vel fyrir hlaupandi mömmur.
Upphæðin sem við söfnum verður svo afhent á árshátið Neistans 8 apríl. Það hefur verið ótrúlega gaman að taka þátt í þessu verkefni og geta gefið til baka, það er jú sælla að gefa en þiggja.
Fyrirtækjunum sem hafa styrkt okkur erum við ofboðslega þakklátar, án þeirra gengi dæmið ekki upp!
Brim Seafood
Foodco
Poulsen
Leanbody
66 Norður
K Sport
Styrktarsjóður 365
Heilsa ehf
Toyota
BL
LímtréVírnet
Ef ykkur langar að fylgjast með okkur, hvetja eða styrkja þá höldum við úti facebook-síðunni Hlaupahópurinn Hjartamömmur ásamt því að vera með snapchat aðganginn hjartamommur.
